Projekti i strehimoreve që bashkoi komunitetin
Në Mitrovicën e Veriut dhe në Zveçan, kafshët endacake kanë qenë prej kohësh të pranishme në rrugë, herë të shpërfillura e herë duke ngjallur frikë. Për Vesna Generalovic, pamja e këtyre kafshëve në të ftohtë përbënte një shqetësim serioz për mirëqenien e tyre, shëndetin publik dhe mirëqenien e komunitetit. Ajo nuk kishte një plan të gatshëm, por ishte e vendosur të ndërtonte strehimore dhe të bashkonte komunitetin rreth kësaj nisme. Kjo kërkonte organizim, bashkërendim dhe angazhim të banorëve.
Të krijosh diçka që ende nuk ekziston
Vesna nuk ishte eksperte e planifikimit urban apo e shëndetit publik dhe nuk drejtonte ndonjë fondacion. Ajo kishte një ndjenjë të fortë përgjegjësie dhe një synim të qartë: të gjente një zgjidhje të sigurt dhe humane, në shërbim të kafshëve dhe të njerëzve. Për ta kthyer këtë synim në veprim, asaj i nevojitej mbështetje.
Një grant, një plan, një komunitet
Qendra Burimore për Shoqërinë Civile mbështeti Vesnën dhe nismën e saj, Roof for Paws, me një grant prej 5 000 eurosh në kuadër të Programit të Vullnetarizmit të EURC-së. Krahas financimit, ajo përfitoi mentorim për planifikimin e projekteve, bashkërendimin e punës së vullnetarëve dhe ndjekjen e ndikimit të projektit.
Ndryshimi ishte fizik dhe shoqëror. Me ndihmën e dhjetëra vullnetarëve, Vesna drejtoi ndërtimin e strehimoreve rezistente ndaj kushteve atmosferike për kafshët endacake. Njëkohësisht, nisma promovoi mbajtjen e përgjegjshme të kafshëve shtëpiake dhe ndërgjegjësimin mjedisor.
Projekti krijoi mundësi bashkëpunimi për të gjithë, duke përfshirë të rinj, punëtorë të kualifikuar dhe qytetarë të shqetësuar për këtë çështje. Krahas strehimoreve, ai krijoi një model vullnetarizmi dhe angazhimi qytetar të nxitur nga vetë komuniteti.
“Ky projekt ka pasur ndikim të qëndrueshëm në komunitetin tonë. Ai ka treguar se edhe nismat e vogla të komunitetit sjellin ndryshime të rëndësishme kur udhëhiqen me përkushtim dhe marrin në kohë mbështetje logjistike dhe profesionale. Një nga arritjet tona më të mëdha ka qenë ndërgjegjësimi për mënyra më humane dhe të përgjegjshme të kujdesit për kafshët endacake. Shtëpizat për qen që ndërtuam ofrojnë strehim dhe shprehin dhembshurinë e përgjegjësinë tonë të përbashkët”, thotë Vesna Generalovic, themeluese e Roof for Paws.
Për kafshët dhe komunitetin
Rezultati ishte i dukshëm: strehimore rezistente ndaj kushteve atmosferike, të ndërtuara në hapësira publike me rëndësi për komunitetin. Ato u ofronin mbrojtje dhjetëra kafshëve endacake gjatë dimrave të ashpër dhe verave të nxehta.
Ndërkohë, projekti ndikoi edhe në marrëdhëniet mes banorëve. Të rinjtë u përfshinë me energji dhe ide. Punëtorët e kualifikuar vunë në dispozicion kohën e tyre dhe, në disa raste, u mësuan të tjerëve aftësi praktike gjatë punës. Banorë nga grupe të ndryshme etnike, që më parë nuk kishin komunikuar me njëri-tjetrin, nisën të planifikonin dhe të ndërtonin së bashku. Bashkëpunimi për një qëllim të përbashkët ndihmoi në forcimin e lidhjeve brenda komunitetit.
“Angazhimi i vullnetarëve, gjatë ndërtimit dhe më pas, ishte frymëzues. Njerëz të të gjitha moshave u bashkuan për një qëllim të përbashkët. Shumë prej tyre merrnin pjesë për herë të parë në një veprimtari komunitare. U përballëm edhe me vështirësi: disa shtëpiza për qen u vodhën. Megjithatë, njëra u gjet falë vendosmërisë dhe përpjekjeve të vullnetarëve. Kjo tregoi ndjenjën e fortë të përkatësisë dhe kujdesit që nxiti nisma”, shprehet Vesna Generalovic.
Strehim dhe përgjegjësi e përbashkët
Roof for Paws tregon çfarë arrihet kur nismave qytetare u jepet besim, orientim dhe mbështetje me burime. Kur njerëzit dhe organizatat mbështeten për të vepruar për çështjet që kanë rëndësi për ta, vullnetarizmi ndihmon në bashkimin e komunitetit.
“Personalisht, kjo përvojë më ka dhënë shumë kënaqësi. Jam krenare për ndikimin që kemi pasur dhe besoj se ky model duhet të zbatohet edhe në komuna të tjera. Me angazhim më të gjerë të vullnetarëve dhe mbështetje sistematike, mund të bëjmë më shumë për të trajtuar gjendjen urgjente dhe gjithnjë e më të rënduar të kafshëve endacake në Kosovë*. Besoj se kjo qasje ndihmon në zgjidhjen e problemit dhe përcjell një mesazh: si shoqëri, jemi të aftë të veprojmë më mirë dhe në mënyrë më humane”, thotë Vesna Generalovic.
Për Vesnën, puna nuk ka përfunduar.
“Jemi gati të vazhdojmë të mbështesim të gjithë ata që kanë nevojë për ndihmë. E vlerësojmë çdo person që ka kontribuar ose do të kontribuojë në çfarëdo mënyre, sado të vogël. Çdo përpjekje ka rëndësi. Ky projekt më ka treguar sa shumë arrihet kur njerëzit bashkohen për një qëllim të përbashkët. Së bashku, mund të sjellim ndryshim.”
Kjo histori u përgatit në bashkërendim me Qendrën Burimore për Shoqërinë Civile në Kosovë*.